Hüt isch Sunntig, s Wetter isch ned sehr schön, d Fahne vor em Fenster wirblets ume und s Matterhorn hüllt sich in Nebel. Am Himmel en Streife liecht vo Sunne beschineni Wolke, wo jetz den aber au scho bald wieder under gad. Ich i mim Studio (Besechammere set ich nümm sege. De Psitzer isch ja unheimlich stolz uf sis Rich. Er heds in liebevoller Handarbeit selber renoviert, d Decki zimmeret, Vorhäng gnäiet, liebevoll igrichtet. Nur leider hed er weder Talent no Gschmack...). Fühl mich inzwüsche wohl, han eimal alles vo obe bis unne mit Febreze besproit, d Chuchi und s Bad ganz putzt (inkl. de Dampfabzug %( iiiihhh!), d chuchi chli dekoriert, mich a die fehlend Bodeheizig gwöhnt und glert d Bilder a de Wänd z ignoriere. Ja hed ja au es paar würklich cooli Sache: de Matterhorn-Blick! En eigni chlini Wäschmaschine, en Chüelschrank ganz für mich und niemert wo sich ab mim Puff stört. Hihi.
Zermatt, ja was sel ich sege. Es cools Dörfli mit es paar Spezialitäte. Das ja Auto frei isch, fräsed überall die Elektrochäreli ume. Es gid sogar Elektro-Polizei-Autöli und Elektro-Heizöl-Transporterli, sweet. Es isch zum Gugus arschchalt! Minus 13 Grad am Morge am 9i sind gar kei Selteheit und das es am Tag dure ned meh als Null wird au ned. Und de Winter hed ja schliesslich au erst agfange. Mit de Winterboots dur de Schnee go schaffe isch inzwüsche normal. Mit de Winterschue in Usgang nonig so. Ohni Chappe lauf ich scho gar nüm ume, d Finger und d Nase müend sich dra gwöhne... Aber so chani wenigstens sege, die rote Bagge und die rot Nase siged vo de Chälti und ned vo was anderem. Hihi.
Nach dem halbe Jahr wird ich en Grundwortschatz in Italienisch und Portugisisch ha, strange, aber isch wichtiger als Französisch. Zermatt hed ja au die grössti portugisischi Gmeind i de Schwiiz. Und da en Teil devo de Lohn via Einmaliger Vollmacht vom Konto vom Arbetgeber uszahlt bechund, bzw. bi eus abhole chan, hemmer am Monets-Endi fast kei anderi i de Bank. Bis jetz isch eineweg no sehr ruhig gsi, d Strasse vom Dorf aber au. Jetz die letzt Wuche sind chli meh Touris uftaucht, langsam füllts sich chli. Das isch au guet so, wil vorher isch es ja würklich fast wie usgstorbe gsi, die meiste Hotels hend zue gha und irgendwie isch das Schii-Ort-Feeling eifach ned ume gsi.
Würklich s geilste isch min Arbetsweg. Am morge churz vor de 8i dur de Schnee i Richtig Matterhorn stapfe, über em Horä gad grad d Sunne uf und färbt de Zipfel vo de einte Siite orange. Boarde bin ich au scho gsi, ganzi 5 mal, allerdings nie würklich usgibig. Sit dem Wucheend isch meh oder weniger alles offe, ich aber z fuhl gsi zum hüt uf d Piste ga.
Viellicht chan ich ja den au chli wallisere, lose amel immer schön de Oberwalliser- Radiosender. Isch hald scho geil.
Und gueti Vorsätz han ich ja au no gha. Englisch lere vorallem. Naja mal luege was det drus wird...