Nachdem mir in Dominical doch einigermasse hend chöne schlafe und au öpis fascht gniessbars zum Zmorge becho hend, hend mer eus sofort uf de Weg über de Cerro de la Muerte nach Alajuela gmacht. Bi 60 Stundekilometer gsed mer sehr viel vo de prächtige Natur. Und es gad de Berg duruf und duruf und duruf... Vo Null uf 3300 und wieder durab. Da in Costa Rica d Hauphauptstrass ja au zmitzt durs Citycenter vo de Hauptstadt gad hemmer eus doch no mit em Autofahrstil vo San Jose müese afründe. Aber eigentlich no schlimmer isch, dass in Alajuela absolut kei Strasseschilder vorhande sind. Die Stadt isch ja schön quadratisch mit System ufbaut und mir hend denkt euses Hostel z finde sig ganz eifach. Denkste. Nach fast ere Stund umekurve (mir hend sogar 2 Charte gha wo nüt gnützt hend) und eme Psuech ime Chinder-überloffene Mac (Kreisch, überall Chind) hemmer doch beschlosse mer genged s Auto zerst go abge und nemed vo det s Taxi ist Hostel. Fies, wieso hed ers uf Ahieb gfunde?
Wen ich ned no im Reisefüerer glese het, dass mer in Alajuela ned set Asiatisch esse ga, hetted mer eus bim Znacht esse sicher ned so amüsiert. Mir sind nemlich (es isch würklich es versehe gsi!!) doch ime Asiat glandet und es isch au guet gsi. Und mir hend au kei Fuessbäll becho; leider (hihi, Helena). Am halbi 5i Ortsziit ufsta und s Taxi an Flughave ne und sich det weg em Chaos und unfähigem Personal tierisch ufrege und den i de Abflughalle bi berugender live Musig sich uf diheime freue... Nomal en Ireise-Stempel vo Amerika im Pass, Flugbegleiter wo sich i de Schwümmweste verhasplet und viel viel z wenig Schlaf.
wir drei...
Costa Rica giltet ja als d Schwiiz vo Mittelamerika. Das stimmt i vielerlei Hinsicht: D Natur isch eifach de hammer, und so grüen. Es regnet dauernd ;-) es isch ja au Regeziit gsi. Sie sind im Verglich zu Mittelamerika es richs Land. I de Berge gseds genau glich us wie i de Schwiiz i de Berge. Und sie hend die gliche Chüe (id de tüüüfere Lage heds au no so Dromedar-Chüe). Und sie sind neutral ;-)
Es gid aber au es paar gaaanz schiefi sache! Schuelzone! 25er Zone all paar hundert Meter zmitzt i de Hauptstrass. Sie sind allgemein ned nur sehr tier- und naturfründlich sondern au sehr chinderfründlich. Und sie hend scho lang s Militär abgschafft und s Geld id Bildig investiert. (Und wer erstunts eigentlich, es funktioniert. D lüt lebed eifach, sind aber definitiv ned arm. Merksch au bim rede, dass sie en recht gueti Bildig hend, vorallem au Weltblick.)
SchulzoneHm, was mir am beste Gfalle hed: de Kolibri-Garte in Selvatura. *schwärm* Aber eigentlich alles. Costa Rica isch es super spannends Land zum reise und sehr sicher, nie Problem gha. Und au gar ned so schlimm turistisch (amel i de Regeziit, Manuel Antonio usgno!)
KolibriNo en Gedanke zu Amerika: Isch Home Land Security s gliche wie de schiizer Heimatschutz? Und wieso mues mer bi de Ireis id USA vier mal sin Name und sini Agabe uf es Blatt schriebe und bi de Ireis id Schwiiz nie? Und niemert wot Fingerabdrück und mit dir schwetze. Um was hend sie eigentlich so Angst???
"Tierli"
Schildkröte
Vulkan Poas
Manuel Antonio
dreckigs Auto
Bananenplantage
Vulkan Arenal
Pelikane